Əbəsə surəsi

عَبَسَ وَتَوَلَّىٰٓ

O qaşqabağını sallayıb üzünü yana çevirdi –

أَن جَآءَهُ ٱلْأَعْمَىٰ

yanına bir korun gəlməsinə görə.

وَمَا يُدْرِيكَ لَعَلَّهُۥ يَزَّكَّىٰٓ

Nə bilirdin ki, bəlkə o günahlardan təmizlənəcəkdi

أَوْ يَذَّكَّرُ فَتَنفَعَهُ ٱلذِّكْرَىٰٓ

və yaxud nəsihət dinləyib faydalanacaqdı.

أَمَّا مَنِ ٱسْتَغْنَىٰ

Nəsihətə ehtiyacı olmayana gəlincə isə –

فَأَنتَ لَهُۥ تَصَدَّىٰ

sən ona diqqət yetirirsən.

وَمَا عَلَيْكَ أَلَّا يَزَّكَّىٰ

Onun təmizlənməməyinin sənə bir dəxli yoxdur.

وَأَمَّا مَن جَآءَكَ يَسْعَىٰ

Səy göstərib sənin yanına gələn,

وَهُوَ يَخْشَىٰ

Allahdan qorxan kimsəyə gəlincə,

فَأَنتَ عَنْهُ تَلَهَّىٰ

ona məhəl qoymursan!

كَلَّآ إِنَّهَا تَذْكِرَةٌ

Xeyr! Şübhəsiz ki, bu, bir nəsihətdir.

فَمَن شَآءَ ذَكَرَهُۥ

Kim istəsə, qoy onu xatırlayıb ibrət alsın.

فِى صُحُفٍ مُّكَرَّمَةٍ

Bu Quran kəramətli səhifələrdədir,

مَّرْفُوعَةٍ مُّطَهَّرَةٍۭ

yüksək və pak səhifələrdədir.

بِأَيْدِى سَفَرَةٍ

Bu səhifələr elçilərin əllərində –

كِرَامٍۭ بَرَرَةٍ

möhtərəm və müti olanların əllərindədir.

قُتِلَ ٱلْإِنسَـٰنُ مَآ أَكْفَرَهُۥ

Qoy ölsün kafir insan! O necə də nankordur!

مِنْ أَىِّ شَىْءٍ خَلَقَهُۥ

Qoy baxıb görsün Allah onu nədən yaradıb?

مِن نُّطْفَةٍ خَلَقَهُۥ فَقَدَّرَهُۥ

Allah onu nütfədən yaratdı və müəyyən şəkildə formalaşdırdı.

ثُمَّ ٱلسَّبِيلَ يَسَّرَهُۥ

Sonra da onun yolunu asanlaşdırdı.

ثُمَّ أَمَاتَهُۥ فَأَقْبَرَهُۥ

Sonra onu öldürüb qəbirə yerləşdirdi.

ثُمَّ إِذَا شَآءَ أَنشَرَهُۥ

İstədiyi bir zaman onu dirildəcəkdir.

كَلَّا لَمَّا يَقْضِ مَآ أَمَرَهُۥ

Xeyr! O, hələ də Allahın ona buyurduğunu yerinə yetirməmişdir.

فَلْيَنظُرِ ٱلْإِنسَـٰنُ إِلَىٰ طَعَامِهِۦٓ

Qoy insan yediyinə diqqət yetirsin bir az!

أَنَّا صَبَبْنَا ٱلْمَآءَ صَبًّا

Həqiqətən, yağışı bol-bol Biz yağdırırıq.

ثُمَّ شَقَقْنَا ٱلْأَرْضَ شَقًّا

Sonra da yeri çat-çat yarıb

فَأَنۢبَتْنَا فِيهَا حَبًّا

orada taxıl yetişdiririk.

وَعِنَبًا وَقَضْبًا

Habelə üzüm və yonca,

وَزَيْتُونًا وَنَخْلًا

zeytun və xurma ağacları,

وَحَدَآئِقَ غُلْبًا

sıx-sıx bağlar,

وَفَـٰكِهَةً وَأَبًّا

meyvələr və otlar da bitiririk.

مَّتَـٰعًا لَّكُمْ وَلِأَنْعَـٰمِكُمْ

Bu nemətlər sizin istifadəniz və mal-qaranızın faydalanması üçündür.

فَإِذَا جَآءَتِ ٱلصَّآخَّةُ

Qulaqbatırıcı bir səs gələndə –

يَوْمَ يَفِرُّ ٱلْمَرْءُ مِنْ أَخِيهِ

o gün insan qaçacaq öz qardaşından,

وَأُمِّهِۦ وَأَبِيهِ

anasından, atasından,

وَصَـٰحِبَتِهِۦ وَبَنِيهِ

arvadından və övladlarından!

لِكُلِّ ٱمْرِئٍ مِّنْهُمْ يَوْمَئِذٍ شَأْنٌ يُغْنِيهِ

O gün onlardan hər birinin yetərincə işi olacaqdır.

وُجُوهٌ يَوْمَئِذٍ مُّسْفِرَةٌ

O gün neçə-neçə üzlər parlayacaq,

ضَاحِكَةٌ مُّسْتَبْشِرَةٌ

güləcək və fərəhlənəcəkdir.

وَوُجُوهٌ يَوْمَئِذٍ عَلَيْهَا غَبَرَةٌ

O gün neçə-neçə üzlərə toz-torpaq hopacaq,

تَرْهَقُهَا قَتَرَةٌ

onları zülmət bürüyəcəkdir.

أُو۟لَـٰٓئِكَ هُمُ ٱلْكَفَرَةُ ٱلْفَجَرَةُ

Məhz onlar kafirlər, günahkarlardır!