Şəms surəsi

وَٱلشَّمْسِ وَضُحَىٰهَا

And olsun günəşə və onun saçdığı şəfəqə!

وَٱلْقَمَرِ إِذَا تَلَىٰهَا

And olsun ondan sonra zühur edən aya!

وَٱلنَّهَارِ إِذَا جَلَّىٰهَا

And olsun günəşi açıqlığa çıxardan gündüzə!

وَٱلَّيْلِ إِذَا يَغْشَىٰهَا

And olsun günəşi bürüyən gecəyə!

وَٱلسَّمَآءِ وَمَا بَنَىٰهَا

And olsun göyə və onu qurana!

وَٱلْأَرْضِ وَمَا طَحَىٰهَا

And olsun yerə və onu döşəyənə!

وَنَفْسٍ وَمَا سَوَّىٰهَا

And olsun nəfsə və onu yaradıb kamilləşdirənə,

فَأَلْهَمَهَا فُجُورَهَا وَتَقْوَىٰهَا

ona günahları və Allahdan qorxmağı təlqin edənə!

قَدْ أَفْلَحَ مَن زَكَّىٰهَا

Nəfsini günahdan təmizləyən uğur qazanmışdır.

وَقَدْ خَابَ مَن دَسَّىٰهَا

Onu günaha batıran isə ziyana uğramışdır.

كَذَّبَتْ ثَمُودُ بِطَغْوَىٰهَآ

Səmud qövmü öz azğınlığı üzündən Allahın elçisini təkzib etdi.

إِذِ ٱنۢبَعَثَ أَشْقَىٰهَا

Onların ən bədbəxti dəvəni kəsməyə qalxdıqda

فَقَالَ لَهُمْ رَسُولُ ٱللَّهِ نَاقَةَ ٱللَّهِ وَسُقْيَـٰهَا

Allahın elçisi onlara dedi: “Allahın bu dişi dəvəsinə toxunmayın və onun su içməsinə mane olmayın!”

فَكَذَّبُوهُ فَعَقَرُوهَا فَدَمْدَمَ عَلَيْهِمْ رَبُّهُم بِذَنۢبِهِمْ فَسَوَّىٰهَا

Onlar isə peyğəmbəri yalançı sayıb, dəvənin diz vətərini kəsdilər. Onların Rəbbi də bu günahlarına görə onların hamısını qırıb yerlə-yeksan etdi.

وَلَا يَخَافُ عُقْبَـٰهَا

Allah günahkarlara etdiyinin nəticəsindən çəkinməz!